LAOAG CITY – Nasugatan ti maysa nga Overseas Filipino Worker a lalaki kalpasan a napaltugan iti maysa a minatayan iti Barangay Rayuray iti ciudad ti Batac.
Segun ken ni Police Lt. Col. Jerome Wangkey, ti chief of police iti ciudad ti Batac, ti biktima ket agtawen ti 49, naasawaan ken seaman idinto a ti suspek ket agtawen ti 43, naasawaan, mannalon ken agpada dagitoy a residente iti nadakamat a barangay.
Inbatad ni Wangkey a basar iti imbestigasyon da, kabayatan nga agay-ayam dagiti maseknan ti baraha iti minatayan ket adda ti saan a nagkinnaawatan ti suspek ken biktima ngem dagus metlaeng a napagsardeng dagitoy.
Kuna na a pumanaw koman ti biktima ken ti kadwa na iti lugar ngem nagsubli da tapno agpadespensar iti napasamak.
Nupay kasta, kabayatan ti ipapanaw ti biktima ket nakangngeg da ti putok ti paltog kalpasan na ket nakita da ti biktima nga adda ti sugatna idinto a nakita da ti suspek a nakaiggem ti saan a masinunuo ti klase na a paltog.
Naitaray a dagus ti biktima iti ospital para iti pannakaagas ti sugat iti buksitna ken addan iti natalged a kasasaad.
Naamoan a dagus met a nagtalapwagaw ti suspek ngem naarestar metlaeng dagiti otoridad iti Sitio Kawayan iti metlaeng Barangay Rayuray iti ciudad ti Batac babaen ti naisayangkat nga hot-pursuit operation.
Nakakumpiskar met dagiti otoridad iti nakapasamakan ti insidente ti maysa a basyo ti kalibre 45 a paltog.
Iti agdama, nagtalinaed ti suspek iti Philippine National Police iti ciudad ti Batac ken maisagsagana metten ti pannakaipila ti kaso a frustrated murder kontra kenkuana.
Kabayatanna, nagpanawagan ni Wangkey iti publiko a saan koma nga agpasugal uray iti minatayan gapu ta napaneknekan nga awan ti napintas nga itundana daytoy no di ket pakaitundaan laeng ti saan a panagkikinnaawatan wenno panagdidinnangran a kas iti napasamak iti Barangay Rayuray iti nasao a ciudad.
