LAOAG CITY – Naragsak nga inpakaammo ni Mr. Lawrence Valmonte, Overseas Filipino Worker Adviser idiay Saudi Arabia nga addan iti nasayaat a kasasaad ni Ms. Catherine Tagaca Andres a residente iti Brgy. 21 iti ili ti Sarrat ngem agdama nga agserserbi kas Overseas Filipino Worker idiay Saudi Arabia kalpasan a minaltrato isuna ti amona a lalaki.
Segun kenkuana, iti agdama ket addan iti kustodiar ti Khalid Saad Khzam Alhawmizi Recruitment Agency ni Catherine kabayatan nga iyur-urayna ti baro nga employer daytoy.
Inbatadna a kalikagum ti maseknan nga Overseas Filipino Worker nga agtalinaed pay laeng iti nasao a pagilian ken agbiruk ti baro nga amona.
Kunana a manarimaan metten ti pannakaiproseso dagiti amin a dokumento ni Catherine babaen iti tulong ni Labor Attache Hon. Roel Martin iti Migrant Workers Office idiay Jeddah, Kingdom of Saudi Arabia.
Inlawlawagna a ti in-upload ni Catherine a bidyu iti online nga agkidkiddaw ti tulong ket nai-post pay laeng iti napalabas a bulan no sadino dumanonen iti sumurok 4 a milyon a views.
Nupay kasta, inpasiguradona a matulungan ti nasao nga Overseas Filipino Worker agingga a makabiruk daytoy ti nasaysayaat nga employer.
Mainaig iti daytoy, inpalgakna a saan a dagus nga in-report ni Catherine ti napasamak kenkuana isu a saan a dagus a natulungan isuna.
Innayonna a posible a mapilaan ti reklamo ti amo ni Catherine a nangdangran kenkuana banag nga isu ita ti as-asikasoen ti Migrant Workers Office idiay Saudi Arabia.
Kabayatanna, naammoan nga addan ti maysa a tawen ken uppat a bulan nga agtartrabaho kas Overseas Filipino Worker ni Catherine.
