LAOAG CITY – Kinumpirmaran ni Mrs. Merlita Lazaro, residente iti Brgy. 55 Vira ditoy siudad ti Laoag a nakaawiden ti anak na nga OFW a ni Janice Lazaro Robella ditoy Pilipinas Hulyo 17 manipud iti Jeddah, Saudi Arabia.
Segun kenni Lazaro, nagtainaed pay laeng ti anak na nga OFW iti Manila gapu ta dumalan iti panagquarantine sakbay a makaawid ditoy probinsya.
Maipalagip a nagkamang ti ina ken ama ti OFW ditoy Bombo Radyo Laoag tapno agpatulong.
Kabayatanna, inpakaammo ni Mrs. Nuraiza Barola, OFW idiay Saudi Arabia ken tumultulong kadagiti OFW a naipaay met laeng ti maysa a tawen a suedo na.
Kuna na a ti amo ti maseknan ti gimmatang ti plane ticket tapno makaawid ditoy Pilipinas.
Immuna iti daytoy, nagturong ti maseknan iti POLO tapno maipakaammo ti sitwasyon na a namaltrato babaen ti amo na.
Kuna ni Barola a timmawag ti POLO iti agency ti OFW rason a tinawagan ti agency ti amo ti maseknan.
Inbunannag ni Barola nga adda pay ti dua nga OFW a tubo iti ili ti Pinili ken Badoc a tultulungan na tapno makaawid ditoy pagilian gapu ti pannakamaltrato da.
