LAOAG CITY – Kinumpirmaran ni Mrs. Realyn Gamiao iti Barangay Cabayo iti ili ti Vintar a nakasarita da a mismon ni Mr. Gelienor Pacheco, ti caregiver idiay Israel nga innala ti Hamas ken nawaya-wayaan idi Biyernes.
Segun kenni Gamiao, nagbalin nga emosyunal ti pamilya da idi nakasarita da a mismon ken inyistorya ni Pacheco ti nagbalin a kapadasan na bayat nga hostage isuna ti Hamas.
Kunana a basar iti palawag ni Pacheco kadakuada, saan met a dinangran ti Hamas ngem nakita na a mismo ti panangpaltog iti namitlo a daras dagiti militante iti alaga na.
Inpakammo pay ni Pacheco kadakuada nga idi innala ti Hamas isuna pinagparintumeng da isuna ket intutok da ti paltog iti ulo na ngem dakkel a yaman na gapo ta saan da nga inputok daytoy.
Kalpasan daytoy ket innala ti Hamas ken inpan da iti kuta da iti Gaza ken bayat nga adda iti ima ti militante ket maysa laeng a bread ti ipauneg na iti maysa nga aldaw ken no mabisin ket tissue ti kanen na a pamedped iti bisin na.
Mainaig iti daytoy, plano ni Pacheco nga agawid ditoy probinsya agingga intono Disyembre 15 ken agselebrar ti paskua ken baro a tawen, ken manamnama ti panagsarita da kenni Pres. Ferdinand “Bongbong” Marcos Jr.
Iti agdama, manarimaan ti panagrekobre ni Pacheco idi ospital idiay Israel kalpasan a nawaya-wayaan.
