LAOAG CITY – Inadmitir ni Mrs. Jin Agbayani, residente ditoy ciudad ti Laoag ngem agdama nga agtrab-trabaho kas caregiver idiay Tel Aviv, Israel nga agpapan ita ket arig na adda da pay laeng iti “cloud 9”.
Daytoy ket kalpasan ti pannakakita ken pannakasango da ken ni Presidente Rodrigo Duterter.
Inlawlawag na nga innem nga oras da a naguray ken ni Presidente Duterte ngem arigna napunas amin a bisin, puyat ken bannog da apaman a nakita da ti presidente.
Segun ken ni Agbayani, naidumduma ti rikna na no personal a makita ti presidente ikompara iti pannakabuybuya laeng iti telebisyon.
Innayon na nga awan ti baro nga inbagbaga ti presidente iti panagbitla na gapu ta kas kadagiti mabuybuya ket naangaw daytoy ken awan ti “kill joy” kadakuada gapu ta nagkakatawa da amin.
Kabayatanna, kuna ni Agbayani a maysa a gagem ti Presidente iti panagturong na idiay Israel ket ti pannakaipatungpal ti government to government deal ti panag-hire ti Israel kadagiti Pilipino a caregivers gapu ti kangina ti bayadan dagiti kadaraan a mayat nga agubra ti nasao a pagilyan.
