LAOAG CITY – Inpakaammo ni Ms. Shey Pia Abaya, Assistant Manager ti Public Employment Service Office/Migrant Workers Desk Officer ditoy ciudad ti Laoag a ditoy probinsia iti pakaiwayatan ti Overseas Filipino Workers Family Day.
Segun kenkuana, nagasat ti Ilocos Norte ta ditoy ti napili da a pakaiwayatan ti nasao nga aktibidad gapu ta dakkel a tulong kadagiti pamilya dahiti OFW.
Kunana nga amin nga OFW association ditoy probinsia ket naikkan ti gundaway a mangipatulod iti miembro tapno makipagpartisipar iti nasao nga aktibidad.
Inbatadna a naragsak daytoy a selebrasion gapu ta naruay nga aktibidad ken papemprio para kadagiti OFW ti manamnama a maipaay kadakuada.
Malaksid iti daytoy, kuna ni Abaya a manamnama a makipagpaset to pay dagiti naisangsayangan a bisita kas kuma iti Regional Director Gerardo C. Rimorin iti OWWA ken dadduma pay.
Kabayatanna, daytoy nga aktibidad ket maangay intono Desiembre 13 iti Centennial Arena ditoy ciudad ti Laoag.
