LAOAG CITY – Inpeksa ni Ms. Sherryl Barroga, residente ti Brgy. 22, Catuguing iti ili ti San Nicolas ngem agdama nga agpapaay kas Overseas Filipino Worker idiay Australia ti sakit ti nakemna kalpasan a linuko isuna ti maysa a real state company.
Segun kenkuana, nagbayad isuna ti 200 a ribu a pisos para iti pannakaipatakder ti pagtaenganda tapno in-inut nga adda ti makitana a pakakitaan dagiti sakripisio ken bannogna kabayatan nga agtartrabaho daytoy iti ballasiw-taaw.
Nupay kasta, inpalgakna a dandanin tallo a tawenen ti napalabas agpapan iti daytoy a gundaway ket awan pay ti makitana a naipatakder uray maysa a poste iti maaramid a balayda.
Gapu iti daytoy, kalikagumna a maisubli lattan ti kuarta kenkuana tapno sabalin ti mangipasdek ti pagtaenganda.
Inbatadna nga adda ti maysa nga agent ti real state company ti nangipatuludanda ti kuarta babaen iti pannakai-transfer iti bank account.
Inlawlawagna a nagtalekda iti nasao a real state company gapu ta napintas ti serbisioda kadagiti klienteda rason a naallukoy met isuna nga isuda ti alaenna a mangipasdek iti arapaapna a balay.
Mainaig iti daytoy, maladingitan la unay ni Barroga gapu ta natay met laengen ti amana a maysa kadagiti agkalikagum a makaimatang ti pannakaipatakder ti pagtaenganda ket awan met latta ti nagbalbaliw.
Naammoan nga adda dagiti sumagmamano a branch ti maseknan a real state company idiay Ilocos Sur, Baguio, Cagayan ken Isabela.
Kabayatanna, bayat a maisursurat daytoy a damag ket awan pay ti nagbalin a sungbat ti nasao a real state company iti inpatulod a mensahe ti Bombo Radyo Laoag News Team babaen iti email address daytoy.
