LAOAG CITY – Inyestorya ni Ms. Monaliza Rosqueta, maysa nga Overseas Filipino Worker idiay Dubai ti agdama a sitwasyon na iti nasao a pagilian bayat nga agpapapaay kadagiti amo na.
Segun ken ni Rosqueta, iti las-od ti nasurok walo a bulan a panagpapaay na iti Dubai ket awan pay a pulos ti naited kenkuana a day-off wenno aldaw ti panaginana.
Kuna na a daytoy ket iti laksid nga adda iti katulugan ti Non Stop Agency nga isu ti nangiserrek kenkuana ken dagiti amo na a maaddaan ti day off ken kompleto a rest hours.
Inpakaammo na a marigatan iti trabaho na nu sadino a ti bigat ket agisagana ti balon dagiti agbasa nga amo na, aglaba ken agdalus.
Kuna na a nu malpas ti trabaho na sakbay ti alas singko ti malem ket isu laeng ti panaginana na ken agsubli met laeng ti trabaho iti nasao nga oras.
Immuna iti daytoy, inpakaamo ni Rosqueta a kiniddaw na ken ti maysa a kadua na met laeng a katulong iti amo da a maikka da ti day-off.
Nu pay kasta, inbatad na nga ipetpetteng ti amo da a masapol a mabayadan dagitoy ken maisubli amin a naggasto da para kadakuada.
Malaksid iti daytoy, kuna ni Rosqueta nga adda ti pangta ti amo na kenkuana a maireport ken ma-ban iti nasao a pagilian gapu iti akusasyon da a nagtakaw daytoy iti kwentas.
Innayun na a nabayagen nga indanon na ti problema na iti agency ngem arig a saan a naikaskaso.
Kabayatanna, inpakaammo ti Non-Stop Agency ditoy probinsya a saan a naipakaammo a dagus kadakuada ti problema ni Rosqueta.
Nu pay kasta, inpasigurado ti ahensya a mangeggan ti palawag ti maseknan nga agrekreklamo ken maikoodrinar iti main office tapno masolusyunan iti aniaman a problema.
