LAOAG CITY – Kinumpirmaran ni Ms. Janet Roxas, tubo iti ili ti Banna ken agtrabtrabaho idiay Hongkong a naapektaran da ti tear gas bayat ti tignay protesta idi Domingo.
Segun kenni Roxas, gapo ta kaadoan kadagiti istasyon ti tren ket nagserra iti dayta nga aldaw ket nagdesisyon da a nagna nga agawid.
Inlawlawag na a bayat ti pannangna da kadagiti kakadua da ket eksakto a nagipurwak dagiti pulis ti tear gas rason a naangot da ti asok.
Gapo iti daytoy, kunana a nagsagaba da ti panaguyek ken nagsakit ti mata da rason a nagtataray da agingga iti pagnanaedan da.
Nupay kasta, kuna ni Roxas a natlaged da iti lugar gapo ta saan nga agiraman dagiti mangiyus-uswat ti protesta ken pulis kadagiti sibilyan no laketdi saan da nga agisuot ti nangisit ken puraw a bado.
Innayon na a no iti kallabes ket arig na paraiso ti Hongkong, itan ket nagbalinen a “ghost town” gapo iti mapaspasamak.
