LAOAG CITY – Immapela ni Bombo International News Correspondent Jin Agbayani idiay Israel iti panangikararag gapo iti kumarkaro a tensyon gapo iti naipabanto a rockets manipud iti Gaza strip.
Segun kenni Agbayani, tunggal adda ti siren ket nasken nga agturong da a dagus iti shelter ken kalpasan ti 10 a minutos ket rumwar da tapno makalang-ab da ti angin.
Daytoy ket gapo ta ti shelter ket maysa a close space wenno limited space laeng.
Inbatad pay ni Agbayani nga iti uneg laeng ti 15 a minutos ken naminlima da a nagsubli-subli iti shelter kalpasan a nasuruken a 100 a rockets ti nagturong iti pagilyan da.
Kunana nga adda met ti iron dome ti Israel nga isu ti mangsippaw iti rockets ngem 90 a porsiento laeng ti kinaepektibo na daytoy rason a nasken latta ti panagannad da.
Mainaig iti daytoy, kunana nga iti las-od ti sumagmamano a tawen ket ita na laeng a napasaran ti kastoy a pasamak wenno kinagulo iti ayan na a pagilyan.
Mangnamnama met ni Agbayani a saanen a kumaro ti sitwasyon da.
Kabayatanna, inpasigurado met ni Agbayani kadagiti pamilya na ditoy Ilocos Norte a natalged isuna iti agdama.
