LAOAG CITY – Nagballaag ni Mrs. Edelyn Pitpit, OFW idiay Kuwait kadagiti Pilipino nga agkalikagum nga agtrabaho iti nasao a pagilyan a saan dan nga ituloy ti mapan agubra iti nadakamat a lugar.
Daytoy ket gapu iti mapaspasaran na a saan a napintas a pannakatrato na babaen ti babai nga employer na nga Egyptian.
Segun kenni Pitpit, bassit laeng a panagkamali na ket dagus a makaltasan ti sweldo na nga umabot iti 10 ribo a pisos.
Kunana nga adda pay ti tallo a kakadwa na nga OFW nga agpapada a makapaspasar iti panagabuso.
Inbatad na a mapabpabain pay daytoy uray adda sangaili dagiti amo na.
Inlawlawag na a saan da pay a mapakpakan a nasayaat gapu ta no dadduma ket maminsan da laeng a mangan iti maysa nga aldaw ken iyabot da ti makalawas ti kanen da kas iti maysa a supot ti bread.
Inpalgak na a napadasan da pay iti agpidot kadagiti expired a makan tapno laeng adda kanen da.
Malaksid iti daytoy, inbaga na a doble ti oras a panagtrabaho da iti maysa nga aldaw gapu ta umabot daytoy iti 16 oras idinto a 8 nga oras laeng iti nakailanad iti kontrata.
Inbunannag na a saan a mabaybayadan ti sobra nga oras a panagtrabaho da.
Kunana nga inpakaammo nan daytoy a banag iti recruiter na a ni Anabelle Jacobe a taga Sampaloc, Manila ngem nabagaan laeng daytoy nga anusanna ti trabaho na gapu ta ad-adda a kumaro iti sitwasyon no maamoan ti amo na.
Gapu iti daytoy, nagkamang ti asawa ti maysa kadagiti kadwa na iti OWWA-Isabela tapno ireport na ti mapaspasaran da a panagabuso ngem agpapan ita ket awan pay iti aksyon ti nasao nga ahensya.
