LAOAG CITY – Nagpatulong ni Mrs. Edilyn Pitpit, tubo iti probinsya ti Cagayan ken Domestic Helper iti Kuwait iti estasyon ti Bombo Radyo tapno masapulan ti mapukpukaw nga asawa na a residente it Brgy. Nagpatayan iti ili ti Banna.
Daytoy ket kalpasan a nakita na ti report ti Bombo Radyo a pannakabirok ti bangkay ti maysa a lalaki iti Brgy. Pila ditoy siudad ti Laoag.
Iti ekslusibo a pannakiuman ti Bombo Radyo keni Mrs. Pitpit, nagpukaw ti asawa na iti bigat idi Enero 7, 2020 kalpasan a pimmanaw iti pagtaengan da iti nasao nga ili.
Inlawlawag na nga awan met iti ammo na a sakit na daytoy ngem basar kadagiti annak na ket maipagrup a mapukpukaw ti asawa na iti panunot na.
Kuna ni Mrs. Pitpit a nadlaw dagiti annak na nga agmulmulengleng ti ama da bayat iti kaadda da idiay Cagayan idi nagbakasyon da sakbay ti baro a tawen.
Mainaig iti daytoy, adda ti pammati ni Mrs. Pitpit a ti nabirokan a bangkay iti Brgy. Pila ditoy siudad gapu ta agpada da a 5’2” iti asawa na, agpada a kalkalaingan ti pammagbagi da ken iti arwaten na a nangisit nga addaan ti marka nga “A/X armani exchange”.
Nupay kasta, saan pay a sigurado ni Pitpit nga isu iti asawa na ti nabirokan a bangkay gapu ta basar kadagiti annak na nga adda iti ili ti Banna ket puraw ti naudi a bado na.
