LAOAG CITY – Emosyunal ni Mr. Junel Aragon iti Brgy. 22 iti ili ti San Nicolas a nangiyestorya ti kasasaad ti ipag na a ni Ms. Melanie Pilar, maysa nga OFW idiay Qatar ken tubo iti Cauayan, Isabela.
Segun ken ni Aragon, arigna maupaay ti rikna da a makakita kadagiti video nga ipatpatulod ti ipag na gapu ta makita ti pannakamaltrato daytoy.
Inbatad na a malaksid iti pannakadangran ti ipag na babaen kadagiti amo na ket saan pay a mangan iti mamitlo iti maysa nga aldaw.
Kuna na nga uray iti pagtaltalinaedan a kwarto ti ipag na ket arig a saan a mailadawan gapu ta nasipnget nu kasta a kasarsarita da babaen iti video call ken arig a kaidda na ti palangganna a napno iti danom.
Immuna iti daytoy, inpakaammo ni Aragon a nalpasen ti kontrata ti ipag na iti employer daytoy ngem maipagarup a saan a maiprosproseso ti dokumento na.
Kuna ni Aragon nga addan ti panagtawag na iti agency ti ipag na ken naipakaammo a ma-rescue ti ipag na.
Nu pay kasta, inbatad na a basar iti naudi a panagsarita da iti ipag na ket awan pay dagiti nangresponde kenkuana manipod iti agency.
Kabayatanna, agpapan a maisursruat ti damag ket saan a macontact ni Pilar.
Naamoan manipod ken ni Aragon a saan a damo ti ipag na a ti makapasar ti panagmaltrato.
