LAOAG CITY – Nagtalaw ni Ms. Catherine Tagaca, residente ti Brgy. 21 iti ili ti Sarrat ngem agdama nga Overseas Filipino Worker idiay Saudi Arabia iti pagtaengan dagiti amona a pagpapaayanna kas maysa a Domestic Helper iti nasao a pagilian.
Basar iti in-post-na iti online, agsangsangit daytoy nga umad-adayo kalpasan a dinangran isuna ti amona a lalaki kabayatan nga agtartrabaho.
Gapu iti daytoy, naglibas ti nasao nga Overseas Filipino Worker iti pagtaengan dagiti amona tapno maliklikan ti posible a nakarkaro pay a masagabana a sugat.
Nadakamat iti bidyu nga agpakpakaasi ni Catherine a kalikagumna nga agawiden ken agsubli ditoy Pilipinas iti kabiitan a panawen.
Iti agdama, saan pay a nalawag no sadino a lugar ti temporario a pagtarusan wenno pagtalinaedan ti maseknan nga Overseas Filipino Worker kabayatan a maiyur-uray ti panagawidna ditoy pagilian.
Kabayatanna, naidanon metten daytoy a pasamak ken ni Overseas Workers Welfare Administration Director Atty. Sherilyn Malonzo no sadino manamnama a dagus a matulungan ken maiproseso ti panagawid ti nasao nga Overseas Filipino Worker.
