LAOAG CITY – Nagpatulong ti maysa nga overseas Filipino worker idiay Saudi Arabia kadagiti papagayam na ditoy Pilipinas seknan iti maipagarup a pannakaabuso na babaen ti amo na.
Gapu iti daytoy, ni Mr. Robert Albano, tubo iti probinsya ti Cagayan a kumpadre na nga adda ditoy siudad ti Laoag ti nagtignay tapno matulungan ti kumare na a maab-abuso.
Inlawlawag ni Albano nga immuna a napasamak ti panangapros ti amo dagiti ima ni Mrs. Remy Caraang, agtawen ti 24, tubo idiay Allacapan, Cagayan ken OFW idiay Saudi Arabia.
Kuna na a simmaruno iti panangiggem ti amo ti patong ni Caraang ken bisito ti amo ti parte ti bagi na.
Segun kenni Albano, nakasarita na ni Caraang babaen ti mensahe mainaig dagiti napasar na iti amo na ken nakarikna iti panagbuteng.
Nupay kasta, inbatad na a naibalakad ti agency kenni Caraang a saan a rumrumwar iti kuarto na ken isu da iti agtignay tapno marescue daytoy gapu ta kalikagum na ti makaawid ditoy Pilipinas gapu ti gandat a pannakarames na.
Inlawlawag ni Albano a narigat iti signal ti cellphone iti lugar ti kabagyan ni Caraang idiay Allacapan rason nga isuna ti nagtignay.
Saan a makarwar ni Caraang tapno kuma agreport iti ahensya gapu ta nakabantay ti amo na.
Innayon ni Albano nga agdua a tawenen nga agserserbi kas domestic helper ni Caraang idiay Saudi Arabia ken dandani nga agawiden.
Damo a mapasar ni Caraang ti gandat a pannakarames na babaen ti amo sipud idi nangrugi iti trabaho na iti nasao a pagilian.
Iti mainaig a damag, inbalakad ni Mrs. Lizette Atuan, iti Public Employment Service Office iti kaptolyo ti panagturong dagiti kakabagyan ni Mrs. Remy Caraang nga agturong iti kaasetgan nga opisina ti OWWA.
Mabalin a mangipila da ti reklamo ken mangala kadagiti requirements mainaig iti pannakapaawid ni Caraang kalpasan ti gandat a pannakarames na babaen ti amo na iti sumagmamano a daras idiay Saudi Arabia.
Inlawlawag ni Atuan a namaymayat no dagiti kmiembro ti pamilya ni Caraang ti agturong ti kaasetgan nga OWWA.
Innayon na a mabalin a ti mismo nga agency nga akintengngel kenkuana ti mangrescue manipud iti amo na.
