LAOAG CITY – Nagkamang iti Bombo Radyo ni Mrs. Lhynne Agaran, tubo iti ili ti Bangui ken maysa nga OFW idiay Riyadh, Saudi Arabia tapno makaawid ditoy Pilipinas kalpasan a nagpositibo iti covid-19 dagiti amo na.
Segun kenni Agaran, uray kayat na kuman ti agawid ket saan a palubusan dagiti amo na ken lima a bulan laengen sakbay a malpas ti kontrata na a dua a tawen.
Naamoan a ti positibo iti virus ket ti amo na a babai ken dagiti tallo nga annak na.
Inlawlawag na nga iti laksid a dagiti amo na ket positibo iti covid-19 ket agnanaed latta daytoy iti pagtaengan da.
Malaksid iti daytoy, kuna pay ni Agaran nga agrabtrabaho latta daytoy para kadagiti amo na no sadinno ket isuna na pay ti mangurnos iti nagturugan dagiti covid-19 positive nga amo na nga isu ti pabutbutngan na unay.
Kunana a naamoan laeng ti amo na ken dagiti annak daytoy a positibo da iti virus idi napan na nagpaswab test ngem saan met a naipan dagitoy iti isolation unit.
Inbatad na pay nga awan man laeng ti abiso ti health department ti Riyadh ken awan pay ti nakita na a napan nangmonitor kadagiti nagpositibo.
Inlawlawag na a kinasarita na ti amo na a lalaki a kayat nan ti agawid ditoy pagilyan ngem ti insungbat ti amo na ket masapol a mangted ni Agaran ti kwarta ken nagkatawa.
Kunana pay nga inbaga ti amo na a no mabuteng ni Agaran kadagiti nagpositibo iti virus ket mas pay a kabuteng da daytoy.
Mainaig iti daytoy, pinadas nan ti tumawag tapno agpatulong iti agency na ngem maipagarop a saan nga agsungsungbat daytoy.
Kabayatanna, kuna ni Agaran a malaksid a positibo iti virus dagiti amo na ken saan pay unay a mangmangan gapo ta saan a mangted dagiti amo na ken iparit da nga agluto daytoy, ken no dadduma ket maladaw ti sweldo na.
Naipakkammo na metten ti sitwasyon na iti pamilya na ditoy Ilocos Norte.
Naiyumanen metten kenni Mrs. Geraldine Lucero, communication officer iti OWWA ti sitwasyon ken panagkalikagom ni Agaran.
Segun kenni Lucero, masapol laeng a tumawag dagiti kapamilya ni Agaran iti opisina na tapno mailawlawag dagitoy ti sitwasyon ti OFW.
Kunana a ditoy to metten a maibaga dagiti kasapulan a dokumento a masapol tapno maiproseso ti panagawid ni Agaran.
Inbatad na pay a nasken a dagus a makikoordenar ti pamilya ni Agaran ken ti lokal a gobierno ti ili ti Bangui iti OWW iti kapitolyo probinsyal para iti panagawid daytoy.
