LAOAG CITY – Kalikagom da Crystal Faye Crisologo iti ili ti Paoay ken ni Rizzalyn Abriol nga adda idiay Riyadh, Saudi Arabia a mabirukan ti kabsat da a ni Cherie Rose Crisologo nga adda met iti Ha’il iti nadakamat met laeng a pagilyan.
Segun kenni Abriol, idi Disyembre 11 ket timmawag kenkuana ni Cherie gapo ta adda da iti kaubraan na iti police station kalpasan a pinabasol isuda ti amo da a nagtakaw ti kwarta.
Inlawlawag na nga ababa laeng ti panagsarita da kenni Cherie gapo ta ti inusar ti kabsat na ket ti cellphone ti maysa a pulis isut gapo na a saan nan a nasaludsod no sadinno a police station ti ayan da.
Ummuna iti daytoy, naamoan na nga idi simmangpet dagiti amo ni Cherie manipud iti panagbakasyon da idiay Riyadh ket alaen dagiti maseknan ti sweldo da ngem saan a naited ti amo da gapo ta maipagarop nga awan ti kwarta na.
Inbatad na a kalpasan ti sumagmamano nga aldaw ket inbaga ti amo da Cherie a mapukpukaw ti kwarta na ken napabasol dagiti maseknan nga OFW isut gapo na nga inpan isuda ti amo da iti police station.
Gapo iti daytoy, nagpatulong ni Abriol iti pagayam ni Cherie a mapan na kitaen iti kaasitgan a police station ti kabsat na ngem awan ti naala na nga impormasyon gapo ta ti inbaga ti pulis a mismo laeng a kabagyan dagiti naipakustudiyar kadakuada ti mabalin da a pangitedan ti impormasyon.
Mainaig iti daytoy, kuna ni Faye Crisologo nga adda met ti naipatulod kenkuana nga audioclip a mangibagbaga nga adda iti police station ti kabsat na.
Kabayatanna, adda metten ti nagpatulungan ni Abriol idiay Saudi tapno maamoan da no sadinno ti ayan ti kabsat da a ni Cherie.
