LAOAG CITY – Inpannakkel ni Mrs. Carolyn Alegado manipod iti ili ti Paoay nga iti baet a nasapa daytoy a nagasawa ket saan a nagbalin a lapped tapno mapaturposna dagiti tallo nga annakna.
Segun kenkuana, agtawen isuna ti 19 idi agasawa daytoyen isu a nasapa met a nakarikna ti rigat iti panagbiag gapu ta arig napadasanda amin a klase ti rigat iti biag.
Inbatadna a narigat ti nagbalin a kapadasanna gapu ta nagserbi daytoy kas maysa nga Overseas Filipino Worker idiay Hong Kong iti las-ud ti 37 a tawen.
Kunana nga adu a sakripisio ti inaramidna tapno maipaay laeng ti nanam-ay a panagbiag iti pamiliana ken makaturpos iti panagadal dagiti annakna.
Inlawlawagna nga adu a napapateg a pasken ti saanna a naatendaran gapu iti panagbalinna nga Overseas Filipino Worker iti ballasiw-taaw.
Inpalgakna a saan a kaskarina ti panag-abroad gapu ta saanka a mabalin nga agbabawi apaman a nakadanonkan iti pagpaayan a pagtaengan isu a masapol ti mamin-adu a daras a panagpanpanunot sakbay nga agdesision.
Mainaig iti daytoy, kuna ni Mrs. Alegado a saanna man a maibaga iti bagbagina a maysa daytoy a naimballigan nga ina ngem kunana a mapnek daytoy no ania ti parabor iti Dios kenkuana.
Kunana a nasken a kangrunaan a kankanayon nga iyun-una ti Apo a Namarsua gapu ta isuna ti mangit-ited ti kired, namnama ken ayat iti tunggal aldaw iti panagbiag.
Innayonna nga arig agliplippias ti ragsakna kas maysa nga ina a makita a nagbunga amin ti sakripisiona a nagserbi iti naunday a panawen kas Overseas Filipino Worker iti ballasiw-taaw babaen iti panagturpos iti panagadal dagiti annakna iti baet nga awan iti sibayna ti asawana.
Naammoan a nagturpos ti maysana nga anak iti Computer Programming idinto a Marine Transportation dagiti dua pay nga annakna no sadino amin dagitoy ket addan ti bukudda a pagtrabahoan.
Kabayatanna, naragsak ni Mrs. Alegado a naiburayna dagiti kapadasanna kas maysa nga ina a mabalin a pagsakdoan ti adu nga adal nangruna ket maselselebraran ita nga aldaw ti Mother’s Day.
