LAOAG CITY – Pabor ni Ms. Nuraiza Balora, maysa nga Overseas Filipino Worker ngem adda ita ditoy pagilyan ti temporaryo a panangipawil ti Department of Migrant Workers (DMW) ti deployment kadagiti first-time nga agturong idiay Kuwait.
Daytoy ket gapo ta no saan a maipatungpal daytoy ket awan met ti pagmenna-menaan dagiti employers kangrunaan na kadagiti madi ti trato na kadagiti Overseas Filipino Workers.
Segun kenni Balora, maysa kadagiti makitkita na a rason no apay nga agsagsagaba dagiti dadduma pay nga Overseas Filipino Workers ket gapo ti kaada ti madi nga ugali wenno naranggas dagiti sumagmamano nga employers.
Inlawlawag na a dagiti Overseas Filipino Workers a nakaipatang ti nauyong nga amo ket isu kuma ti mapagawid tapno maliklikan ti madi a mapasamak ken saanen a maulit iti kas napasamak kenni Julleebee Ranara.
Mainaig iti daytoy, kunana a rumbeng a mamonitor a nasayaat dagiti maipatulod a domestic helper nangruna ket adda dagiti gundaway a sabali ti pagserbiyan da nga amo iti naibaga iti Overseas Filipino Worker.
Kabayatanna, inbatad ni Balora a bayat ti panangtultuloy ti grupo na kadagiti Overseas Filipino Workers ket umaboten iti nasurok 100 dagiti nagkiddaw kadakuada ti tulong kangrunaan na iti Kuwait ken Saudi Arabia.
