LAOAG CITY – Kinumpirmaran ti maysa nga OFW idiay Saudi Arabia nga adon dagiti Pilipino a napukawan ti trabaho ti nasao a pagilyan.
Daytoy ket kalpasan nga inpatungpal ti nasao a pagilyan ti pagalagadan a “Saudization” wenno pannakai-prayoridad dagiti Saudi citizens a maipaayan ti trabaho.
Segun ken ni Mr. Ryan Calaro, taga Sarrat, Ilocos Norte ngem agdama nga agtrab-trabaho idiay Riyadh, Saudi Arabia kas mekaniko, kaadoan kadagiti pilipino a napukawan ti trabaho ket dagiti mangopisina.
Kuna na a paspasig a saudi citizens ti naisukat ti napanawan a trabaho dagiti pilipino.
Nupay kasta, inlawlawag ni Calaro a dagiti dadduma ket nagbiruk ti sabali a trabaho ti nasao a pagilyan idinto a dagiti dadduma ket nagawid da ditoy Pilipinas.
Innayon na a dagiti OFWs nga addan sangapulo a tawen na idiay Saudi Arabia ket umab-abot ti maysa a milyon a pisos ti backpay da.
