LAOAG CITY – Maragsakan saan laeng a dagiti Israeli no diket uray dagiti Pilipino nga adda idiay Israel kalpasan ti pannakawaya-waya dagiti hostages ti Hamas
Segun kenni Bombo International News Correspondent Elvie Aviador idiay Israel, nagduduma ti emosyon dagiti tattao kageddan iti selebrasyon da gapo ta kalpasan ti dua a tawen ket nakaawiden dagiti hostages.
Inbatad na a makita ti dakkel a nagdumaan dagiti nawaya-wayaan nga hostages kangrunaan na iti bagi da gapo ta kimmuttong dagitoy.
Mainaig iti daytoy, kunana a napalaos ti panagyaman dagiti tattao kadagiti nagbalin a rangtay tapno makaawid dagiti maseknan kadagiti bukod da a pamilya.
Inlawlawag na a ti pinanunot ti Israeli Prime Minister ket ti kasasaad dagiti hostages.
Kabayatanna, mangnamnama ni Aviador nga agtultuloyen ti kapya ken naan-anayen nga aglippas ti gubat saan a kas kadagiti napalpalabas a tawen nga uray adda ti saritaan ket saan nga agpaot.
Kunana a saan met a ti Israel ti mangiyun-una iti gubat no diket sumubbot da laeng no nakaro ti epekto na iti pagilyan da.
