LAOAG CITY – Saan a makadalyasat ti sumagmamano nga oil ken gas shipping iti Strait of Hormuz, maysa kadagiti napateg a pagnaan a maikonektar iti oil-rich Persian Gulf iti open sea kabayatan a kumarkaro ti tension iti rehion no sadinno a pinaigetan ti Iran dagiti pangta kontra kadagiti barko a dumaldalyasat ditoy.
Basar iti ship-tracking data, sumagmamano laeng dagiti lugan pangbaybay ti tumaltalaw iti nasao a waterway ita a lawas ken maipagarup nga awan ti makitkita a sumsumrek.
Nadakamat a maysa a bassit nga oil tanker ti inpaayan ti sanctioned ti Estados Unidos gapu iti panagtulong iti Iran iti panag-export ti gasolina a tinarget iti amianan a kabaybayan ti Oman nupay saan a nalawag no asino ti adda iti likudan ti panangatake.
Inbatad ni Mohsen Rezaei a miembro ti Expediency Discernment Council a binalakadanna ti Supreme Leader ti Iran iti state television nga awan ti aniaman nga American ship a mapalubosan a sumrek iti Persian Gulf.
Adda dagiti barko ti nag-report a nakangngeg ti radio broadcast a maipagarup a manipud iti Iranian navy a mangipawpawil iti panagdalyasat iti Strait uray awan pay ti opisial nga anunsio manipud iti gobierno ti Iran.
Ibilang ti Strait of Hormuz kas maysa kadagiti kapapatgan a chokepoint iti energy market gapu ta mapatta-patta a maysa a lima a paset ti seaborne oil ken liquefied natural gas (LNG) iti intero a lubong ti dumaldalyasat iti inaldaw.
