LAOAG CITY – Inpakita dagiti kameng ti Philippine Coast Guard (PCG) agraman dagiti dadduma pay nga ahensia ti gobierno ti kasasaad iti Manila Bay iti ground zero idiay Limay, Bataan no sadino a limned ti barko nga MT Terranova nga addaan iti karga ti 1.4-milion a litro a lana.
Kabayatan ti panag-inspeksyon ti BRP Suluan, awan ti napaliiw nga oil sheen iti aglawlaw ti Manila Bay malaksid ti naka-iposisionan dagiti oil booms ti Philippine Coast Guard.
Daytoy ket segun ken ni Coast Guard Admiral Ronnie Gil Gavan kabayatan ti aerial inspection-da
Agtultuloy met ti dispersant tapno madadael ken ma-evaporate ti lana manipud iti ground zero a nakailumloman ti MT Terranova.
Impaganetget ni Department of the Interior and Local Government (DILG) Secretary Benhur Abalos a no mangnamnama da a makaisayangkatda iti inaldaw nga inspeksion ken pakdaaraan da ti publiko, tapno maliklikan ti panagbuteng ken espekulasion maipapan iti pannakaibukbok ti lana.
Inaldaw met nga isayangkat ti Department of Environment and Natural Resources (DENR) ti sampling iti nagduduma a probinsia iti aglawlaw ti Manila Bay tapno masigurado ti kalidad ti danum iti nasao a lugar.
Inpaay pay ti Department of Social Welfare and Development (DSWD) ti tulong kadagiti naapektaran iti pannakaibukbok ti lana babaen kadagiti food packs idinto a nakasagana metten dagiti dadduma a suporta ti ahensia no kasapulan.
