LAOAG CITY – Inlawlawag ni Olympian Pole Vaulter EJ Obiena no apay a pinilina ditoy probinsia ti Ilocos Norte a pangiestablisaran ti pole vault pit.
Segun kenkuana, ditoy probinsia ket sidadaan a silulukat no maipanggep kadagiti sports ken addaan kadagiti atleta a kabaelanna nga agbalin a nalaing a pole vaulters ken pakairamanan dagiti interesado nga agbalin a coach.
Inrakurak ti Olympian pole vaulter a daytoy panangi-establishar ti pole vault pit ditoy probinsia ket tapno ad-adda a maapresiar dagiti atleta ken maikkan ida iti gundaway a makipaset kadagiti national games wenno mangibagi iti pagilian iti tay-ak ti pole vault.
Malaksid iti daytoy, inpakaamona a manipud inton Disiembre 6 agingga inton Disiembre 9 ket addanto ti maisayangkat nga Obiena Sports Clinic iti Marcos Stadium ditoy siudad ti Laoag.
Kinunana nga addan to dagiti national team, ken national coach pakairamanan pay ti ama na ti umay mangsanay kadagiti atleta a kayatda nga agbalain a nalaing a pole vaulter.
Patien ni Obiena a dakkel ti maitulong daytoy nga addang tapno matun-uyan ti arapaapna a maaddaan iti Ilocos Norte ti pole vault champion kadagiti masungsungad a tawen.
Malaksid iti daytoy, binigbig ti gobernador ti nagduduma a kababalin nga ik-ikutan ti nadakamat nga Olympian nangnangruna iti kalikagumna a tumulong a mangipadur-as ti sports iti pagilian.
Mainaig iti daytoy, inpatalgedna ti naan-anay a suportana iti daytoy a ganuat kagiddan ti panangipeksana iti napalaus a panagyaman ken ragsakna ken ti sibubukel a probinsia iti panangpili ni Obiena iti Ilocos Norte a kaunaan a probinsia a pangiyestablisaranna iti nasao a pasilidad.
Kabayatanna, naammwan a maidiaya a libre ti panagusar iti pole vault pit iti Marcos Stadium kadagiti atleta nga adda iti babaen ti Ilocos Norte Sports Institute and Research wenno INSPIRE program ti Provincial Sports Office ken kadagiti atleta ti pole vault no makuyog dagitoy babaen kadagiti coach-da.
