LAOAG CITY – Inruar ti Office of the Ombudsman ti desision ni retired Ombudsman Samuel Martires a nangwaswas iti bileg iti 2016 dismissal order kontra ken ni Sen. Joel Villanueva mainaig iti maipagarup a saan nga husto a panagusar ti Priority Development Assistance Fund (PDAF).
Iti desision idi Setiembre 13, 2019, binaliktad daytoy ti immuna a desision ni dati nga Ombudsman Conchita Carpio-Morales a guilty ni Villanueva kadagiti kaso a grave misconduct, serious dishonesty ken conduct prejudicial to the best interest of the service.
Nakailanad nga awan ti umdas nga ebidensia a mangipaneknek a ni Villanueva ket karaman iti panaggastos ti P9.7 milyon iti pundo ti gobierno.
Malaksid iti pammilin ni Martires idi 2019, inruar met idi Huebes ti Ombudsman dagiti kopya ti desision ni Morales idi 2016.
Maipalagip nga inrakurak ni Remulla idi a kiddawenna ken ni Senate President Vicente “Tito” Sotto III nga ipatungpal ti desision ni Morales idi 2016 a mangibilbilin iti panangpadisi ken ni Villanueva.
Nupay kasta, saan a nagbayag ken naduktalan ni Remulla nga inbabawi ni Martires ti desision ni Morales idi Hulio 2019.
Inawagan pay ni Remulla ti panangbasura kadagiti reklamo kontra ken ni Villanueva kas maysa a “secret decision.”
