LAOAG CITY – Nagkiddaw ti Office of the Ombudsman iti precautionary hold departure order kontra kada Senador Chiz Escudero ken ti negosyante a ni Maynard Ngu mainaig iti imbestigasyon iti flood control project.
Kinumpirmaran ti maysa a nangato nga opisyal ti Sandiganbayan a ti aplikasyon ket na-raffle iti Sixth Division ti korte.
Sumangsango da Escudero ken Ngu iti imbestigasyon gapu iti maipagarop a plunder, graft, ken bribery nga adda ti pakainaigan iti pondo para iti flood control program.
Maipalagip nga idi 2025 ket rimuar ti report ti Commission on Audit (COA) mainaig iti maipagarop a maanomalya a multi-billion peso flood control projects iti Metro Manila ken ti sumagmamano a probinsya, karaman dagiti kontrata nga overpriced ken saan pay a nalpas iti umiso nga oras.
Segun iti Commission on Audit, dagitoy a panagkurkurang ket nangitunda ti nakaro a panaglayos iti sumagmamano a lugar, rason a nairugi ti naiget a panagimbestigar ti Ombudsman.
Iti agdama, maim-imbestigar no adda ti direkta a partisipasyon da Escudero ken Ngu kadagiti nadakamat kontrata.
Inpetteng ti Ombudsman a ti travel ban ket napateg tapno masigurado a sumango dagiti karaman iti proseso ti imbestigasyon ken saan a makaruwar iti pagilian kabayatan ti pannakadengngeg ti kaso.
