LAOAG CITY – Inpasingked ni Ms. Robi Ann Felipe, ti mangidadaulo ti contact tracing team ditoy siudad ti Laoag nga adda dagiti sumagmamano a rason iti panagngato ti kaso ti covid-19 ditoy siudad.
Kuna ni Felipe a maysa ditoy ti omicron variant nga al-alisto a makaakar agraman ti pannakaiyuswat ti nagduduma a panagtitipon.
Nu pay kasta, inbatad na nga iti laksid nga alisto ti pangngato ti kaso ket saan a kas iti dadduma a variant ti covid-19 a severe symptoms ti mapasaran dagiti maimpektaran.
Mainaig iti daytoy, inpakaammo ni Felipe a 36 ti kangrunaan a primary contacts ti maysa nga agpositibo iti virus.
Kabayatanna, inlawlawag na a ditoy siudad ti Laoag ket 10 agingga iti 15 dagiti madeterminar a primary contact iti tunggal nagpositibo iti virus ken 50% met kadagitoy ti maduktalan a positibo kalpasan a dumalan iti test.
Innayun na a nasurok 100 dagiti dumaldalan iti RT-PCR test ken nasurok 50 ti dumalan iti antigen test.
