LAOAG CITY – Inbatad ni Engr. Roque Balmes, ti mining Engineer iti OMNICO iti ili a Sarrat nga awan pulos ti pamal-palatpatan da iti naserbi kadakuada a Cease and Desist Order manipod iti Department of Environment and Natural Resources (DENR).
Iti eksklusibo nga interview ti Bombo Radyo Laoag, inbatad ni Balmes nga awan ti naaw-awat da nga aniaman a reklamo kontra iti kompanya da.
Innayon na a nasorpresa da gapu ta awan pay ti naipan iti CDO a linabsing da seknan iti isaysayangkat da a panagquarry.
Inpetteng na a masapol koma pay nga immuna a nangiyuswat dagiti maseknan ti imbestigasyon sakbay a nangiparuk-at da ti CDO kontra iti OMNICO.
Inpasingked pay ni Balmes nga awan ti linabsing da iti operasyon da gapu ta mapmapan met agin-inspeksyon ti DENR ken dadduma pay a maseknan nga ahensya ti gobierno.
Kabayatanna, nagkedked pay laeng ni Engr. Vic Dabalos iti PENRO a nagpainteview mainaig iti daytoy nga isyu.
