LAOAG CITY – Inpakaammo ni Brgy. Chairman Jessie Chris Lagundino, ti Brgy. Pancian iti ili ti Pagudpud nga one lane passable pay laeng ti madalyasatan dagiti motorista iti Sitio Banquero iti nasao met laeng a barangay.
Segun kenkuana, daytoy ket kalpasan ti napasaran a napigsa a tudo idi rabii a nangitunda ti panagreggaay ti daga iti kalsada.
Gapu iti daytoy, napuskol a pitak ti nangabbeng iti kalsada ngem in-inut a nawaknitan babaen kadagiti barangay officials ken ti Department of Public Works and Highways.
Inbatadna nga atiddog ti trapiko idi kalman iti nasao a kalsada isu a kinasapulanda ti dagus a panagresponde dagiti otoridad nagruna ket naruay dagiti motorista ti na-stranded.
Inlawlawagna a mabalin amin a klase ti lugan ti dumalyasat iti maseknan a kalsada ngem kasapulan ti 20 agingga 30 a minuto a panaguray gapu iti agdama a situasion ti nasao a kalsada.
Iti agdama, agtultuloy pay laeng ti maisaysayangkat a clearing operations tapno in-inut a mawaknitan ti nadakamat a kalsada.
Kabayatanna, naammoan a kabayatan a maisursurat daytoy a damag ket simmayaat ti sasaaden ti panawen iti nasao a lugar.
