LAOAG CITY – Inlungalong ni Senador Jinggoy Estrada ti panangbukel ti ‘Philippine Death Check Register’ tapno agsardengen ti panagusar iti nagan dagiti natayen ken saanen a makabutos pay.
Iti gakat ni Estrada, maestablisar ti Philippine Death Check Register, maysa a sentralisado a database a gagem a lappedan ti manangallilaw a panagusar ti identity dagiti natay para kadagiti ilegal nga aktibidad kas kadagiti claim iti insurance ti “ghost patient” ken panangparehistro ti “ghost voter.”
Mamati ni Estrada a nasken a maaddaanen ti registry dagiti pimmusay a mabalin nga i-cross-verify kadagiti kangrunaan nga ahensia ti gobierno.
Karaman ditoy ti Philippine Statistics Authority (PSA), Department of Health (DOH), Department of Social Welfare and Development (DSWD), PhilHealth ken Commission on Elections (Comelec).
Dinakamat ti senador a dagiti report ti maanomalya no sadinno a dagiti claim iti ospital ken dagiti reimbursement ti gobierno ket maal-ala iti nagan dagiti natayen nga indibidual.
Iti babaen ti gakat ni Estrada, dagiti lokal a civil registrar ket mamandar a mangipatulod kadagiti rekord dagiti natay iti Philippine Statistics Authority iti uneg ti naikeddeng a panawen.
Ti Philippine Statistics Authority ti mangpatalinaed ti opisial a Death Check Register a mabalin a ma-access dagiti institusion ti gobierno para kadagiti gagem ti beripikasion.
