LAOAG CITY – Balligi a naarestar ti maysa nga online seller iti naiwayat nga Anti-Illegal Drug Buy-bust Operation iti Brgy. 4, Sta. Maria ili ti Vintar.
Nabigbig ti suspek a ni Rommel Huxley Foronda, agtawen iti 45, balo ken residente met laeng iti nasao a barangay.
Natiliw ti suspek kalpasan a maipagarup a naglako ti maysa nga heat sealed transparent plastic sachet a naglaon ti maatap a shabu babaen iti pulis a nagpammarang a poseur-buyer.
Malaksid iti daytoy, naala pay manipud iti suspek ti 10 nga heat sealed transparent plastic sachet a naglaon ti mapapati a shabu pakairamanan ti maysa a ribu a pisos a nausar kas buy-bust money.
Naammoan a ti nasao a suspek ket dati nga empleado ti lokal a gobierno ngem agdama itan nga aglaklako kadagiti lames babaen iti online.
Mainaig iti daytoy, kuna ni Foronda nga inpabulsada laeng kenkuana dagiti kontrabando a nakumpiskar kenkuana.
Inpettengna a saan daytoy nga aglaklako ti iligal a droga ken awan ti aniaman a pakainaiganna iti nasao nga iligal nga aktibidad.
Kabayatanna, segun ken ni P/Capt. Roi Manuel Ordonio, Hepe ti Philippine National Police iti ili ti Vintar nga idi Mayo pay laeng ket ob-obserbaranda ti nasao a suspek no sadino ket maipagarup a nabayagen nga agus-usar iti iligal a droga.
Kunana a rumrummuar iti imbestigasionda a ti suspek ket isuna ti agal-ala ti suplay ti drogra idiay Metro Manila nga iserrekna ditoy probinsia.
