LAOAG CITY – Balligi ti pannakatiliw ti maysa nga online seller iti inyuswat a drug buy bust operation dagiti kameng ti Provincial Drug Enforcement Unit.
Nabigbig daytoy a ni Jomar Yacas, agtawen ti 25, online seller ken residente iti Barangay Tarrag iti ili ti Pagudpud.
Nagatang manipud iti suspek ti maysa a sachet ti maipagarop a napagango a bulong ti marijuana nga agbalor ti 500 a pisos.
Segun kenni Police Senior Master Sergeant Marcelino Corpuz Jr., team leader ti PDEU, apaman nga inyawat ti suspek ti sachet ti maipagarop a droga iti police pusuer buyer ket isu ti panangtiliw da.
Nakumpiskar pay manipud iti suspek ti dua a sachet ti maipagarop met laeng a napagango a bulong ti marijuana, drug paraphernalia ken buybust money a 500 a pisos.
Inbatad na nga idi Hulyo 2021 ket simmuko iti ili ti Pagupud babaen iti Oplan Tokhang rason a naikkat ti nagan na iti drug watchlist ditoy probinsya.
Nupay kasta, kunana nga it panagmonitor ti PDEU ket nagtultuloy ti iligal nga aktibidad ni Yacas.
Naamoan a ti suspek ket maibilang a Drug Bigtime Personality.
Malaksid iti daytoy, maibilang nga High Value Individual iti Regional Drug watchlist ken High Value Target ti PDEA Region 1.
Kabayatanna, manarimaan metten ti pannakaipadalan iti inquest proceeding iti kaso ti suspek.
