LAOAG CITY – Inpakaammo ni Fire Senior Inspector Ronald Castillo, city fire marshal iti Bureau of Fire Protection ditoy siudad ti Laoag nga adda ti maimon-monitor a maysa nga online seller ti paputok.
Kuna na a saan a sinsinan ti panaglako ti paputok gapu ta adda ti naidesignar a lugar a mabalin laeng a paglakoan.
Iti maysa a lugar a paglakoan ti paputok ket iti babaen ti Gilbert Bridge ditoy siudad ti Laoag nga immunan nga indesignar dagiti otoridad.
Inrakurak ni Castillo nga adda dagiti wagas da para ti pannakamonitor ti maseknan nga aglaklako ti paputok usar ti online nangruna iti pannakasita na no agdeliver daytoy.
Kinumpirmaran na nga awan ti nagan na iti listaan iti BFP.
Inlawlawag ni Castillo a pabor met kenkuana no bilang kumpleto ti permit ti maysa nga aglaklako ken panagpost iti social media nga aw-awisen na dagiti tattao nga umay gumatang iti lako na puesto na.
Maiparit nga agtalinaed dagiti stock ti paputok iti uneg ti pagtaengan ngem ketdi masapul nga adda iti lugar ti nakaidesignaran a paglakoan ti paputok.
Innayon ni Castillo a possible a sumango met ti maseknan nga awanan ti permit ti reklamo a panagsalungasing ti RA 7183 wenno “An Act Regulating the Sale, Manufacture, Distribution and Use of Firecrackers and Other Pyrotechnic Devices” nga adda ti katukad na a multa ken kapaot a pannakaibalud.
Karaman pay a makumpiskar amin nga ilaklako na ken dadduma pay a maiyannatop nga tignay dagiti otoridad kontra ti matiliwan.
Maiparit a mailako dagiti paputok kas iti watusi, 5-star, dadakkel a trayangolo, piccolo, giant bawang, boga, whistle bomb, atomic bomb, goobye Philippines, ken dadduma pay a napipigsa a klase ti paputok.
