LAOAG CITY – Agduduma ti wagas dagiti tattao idiay Shanghai, China tapno laeng makagatang ti supply da uray saan da a makarkarwar kadagiti pagtaengan da gapu iti nakaro a buteng da gapu iti novel-coronavirus.
Daytoy ket basar iti Overseas Filipino worker (OFW) a ni Aida Tieza a taga Quezon Province ngem agdama nga agtrabtrabaho idiay China kas domestic helper.
Iti palawag ni Tieza, gapu ta awanen ti magatang da kadagiti pagtagilakoan ken mabuteng da gapu iti nasao a sakit ti ket addan dagiti agididiaya kadagiti tagilako da iti online.
Gapu iti daytoy, kuna ni Tieza ket paggiinnagawanen dagiti aggatang dagiti mailako kas kadagiti nateng ngem dagiti agdeliver ket saan a mabalin a sumrek iti balay dagiti nagorder.
Inlawlawag ni Tieza a dagiti order ket ikabil da laeng dagiti agdeliver iti ruwar ti balay ken makaammo dan a mangala.
Saan met nga ammo ni Tieza no paggapgapoan dagiti mailaklako iti online ngem ti napateg ket adda ti paggatangan da nangnangruna ket maib-ibusen ti suplay.
