LAOAG CITY – Kinumpirmaran ni Mr. Xavier Ruiz, Officer In Charge ti Provincial Tourism Office a temporario a naipasardeng ti operasion ti Inflatable Water Park iti ili ti Badoc.
Segun kenkuana, daytoy ket kalpasan a mariparda a dimmawel ti dalluyon iti kabaybayan rason a kinasapulanda nga isardeng pay laeng daytoy nangruna ket panawenen ti panagtutudo.
Gapu iti daytoy, dakkel ti peggad a madadael ti Inflatable Water Park no mapasaran ti napigsa nga angin ken tudo ditoy probinsia.
Inbatadna a napatpateg ti kinatalged dagiti turista ken gangganaet nga agturong iti maipanpannakkel a tourist destination ditoy probinsia.
Nupay kasta, inlawlawagna nga apaman a maobserbaran ti Ilocos Norte Tourism Office a nasayaat ken napintasen ti sasaaden ti panawen ket dagusda met laeng daytoy nga isubli.
Innayonna nga ikagumaanda nga isubli nga insigida ti operasion ti Inflatable Water Park gapu ta makitada nga ad-adu dagiti agturturong a bisita sipod naiyakar daytoy iti ili ti Badoc manipud iti orihinal a lokasionna iti Paoay Lake iti ili ti Paoay.
