LAOAG CITY – Napalaos ti ragsak ni Mr. Fregidio Lorenzo iti Brgy. Bengcag ditoy siudad ti Laoag ken presidente iti Tadero Association kalpasan a naipalubos ti panagsubli ti operasyon ti pallot ditoy probinsya .
Daytoy ket kas naiyataday iti Executive Order 175-22 ni Governor Manotoc wenno ti pannakaipalubos ti pallot kadagiti lugar nga adda iti babaen ti Alert Level 1 ken Alert Level 2.
Kuna ni Lorenzo a dakkel a tulong kadagiti pada na a tadero kasta met dagiti mammallot ken agtartaraken ti manok.
Gapu iti daytoy, inbatad na a dagus nga inyuman na iti management ti galyera para iti pannakaiproseso ti permit to operate ken dadduma a kasapulan iti panagsubli ti panagpallot.
Immuna iti daytoy, inlawlawag ni Lorenzo a dakkel ti napukaw iti pagsapolan dagiti pada na a tadero sipud naisardeng ti oprerasyon ti pallot gapu iti pandemiya.
Iti E.O. ni gobernador Manotoc, masapol nga adda ti lisensya ti pagpallotan, dagiti sumrek iti venue ket masapol a makaipresentar ti vaccination card, saan a makastrek dagiti agtawen ti 18 agpababa, addaan ti commorbidities, masikog ken addaan ti sintomas ti covid-19.
Saan pay a maipalubos ti pisikal a panaggi-innawat ti kwarta iti, sabali a klase ti sugal, panaginom ti arak, panagitugot ti armas malaksid kadagiti otoridad ken maipawil ti live streaming.
Mainaig iti daytoy, maysa a pagpallotan laeng ti maipalubos nga agoperar iti tunggal siudad wenno ili, dagiti partisipantes ket residente iti probinsya ken 50% ti kapasidad ti venue, masapol a masurot ti dua a metro a social distancing, ken lima laeng nga indibidual ti mapalubusan iti uneg ti ring wenno ruweda.
Kabayatanna, maysa laeng nga aldaw iti kada lawas a maipalubos ti pallot manipod iti alass nuebe ti bigat agingga iti alas nuebe iti rabii.
Siasinoman a sumurot kadagiti naiyetnag a pagannurutan ket sumango iti umiso a pannusa.
