LAOAG CITY – Inadmitir ni Mr. Dennis Retotar, operator dagiti taxi nga agop-operar ditoy ciudad ti probinsya a bassit pay laeng dagiti mapaspasadaan da.
Kuna na nga ad-ado pay laeng dagiti pilyen na ti aglugan ti pampasahero a jeep wenno tricycle.
Segun kenkuana, ti terminal da ket iti paset ti Barangay Magat Salamat ditoy ciudad ti Laoag ngem ti kangrunaan a pagparparadaan da ket iti dakkel a mall iti ili ti San Nicolas.
Inpakaammo na a sakbay a nangrugi da a nagpasada ket nagsurat da iti opisina ni Mayor Michael Marcos-Keon ngem ti nakasarita da ket ni Anthony Agcaoili.
Malaksid ken ni Agcaoili, kuna ni Retotar a nakasarita da payen ni ABC Federated President Elmer Faylogna ken ti manager iti dakkel a mall iti ili ti San Nicolas mainaig iti operasyon da.
Iti agdama, lima pay laeng dagiti taxi nga agop-operar ditoy probinsya.
