LAOAG CITY – Nagtaripnong dagiti opisial manipud iti Thailand ken Cambodia para iti naan-anay a panagsarita maipanggep iti ceasefire.
Naiyuswat ti panagtaripnong idiay Malaysia kas panagsagsagana para iti panagtaripnong dagiti defense ministers ti dua a pagilian inton Huebes.
Ti naikeddeng a panagtaripnong inton Huebes ket obserbaran dagiti pannakabagi manipud idiay China, Estados Unidos ken Malaysia para iti naan-anayen a panaglippas iti nagbaetan ti dua a pagilian.
Naammoan a manarimaan ti pannakaipinal ti detalye ti monitoring team manipud iti Association of Southeast Asian Nations (ASEAN).
Maipalagip nga iti napalabas a bulan idi nangrugi ti riribuk ti sumagmamano a siglo a nagbaetanda a nakatayan ti 43 nga indibidual no sadinno a dumanon iti 300 a ribu nga indibidual ti nagibakwit.
