LAOAG CITY – Sangsangkamaysa dagiti amin a nagatendar iti pannakairubuat ti Human Papillomavirus Immunization Program ti Department of Health a nangipaay ti suportada iti nasao a programa.
Maibilang ditoy dagiti opisial ti gobierno probinsial ti Ilocos Norte pakairamanan ti Department of Education Division of Ilocos Norte, Parents Teachers Association ken ti pribado a sektor.
Binigbig ni Cong. Angelo Marcos Barba iti maikadua a Distrito ti probinsia ti napintas a panagtitimpuyog dagiti nagdumaduma nga ahensia ti Department of Health, Department of Education, Mariano Marcos Memorial Hospital and Medical Center, gobierno munisipal iti ili ti Banna pakairamanan dagiti sumagmamano a doktor.
Kagiddan daytoy, inpadanonna ti panagyamanna kadagiti nagannak iti panangipalubosda kadagiti annakda a mabakunaan ti Human Papillomavirus a dakkel a banag iti pannakaisagana dagitoy para iti masakbayan.
Mainaig iti daytoy, inpatalgedna ti naan-anay a suportana iti nasao a programa.
Iti panangisuno ni Senior Board Member Rafael Chua Medina ken ni Gob. Matthew Marcos Manotoc inpanamnamana met ti suporta ti sibubukel a gobierno probinsial ti Ilocos Norte iti nasao a programa a mangitunda iti pannakailiklik dagiti ubbing a babbai iti sakit a cervical cancer.
Inpeksana pay ti panangnamnamana a daytoy a programa ti ili a Banna ket tuladen dagiti dadduma pay a Local Government Units ditoy probinsia.
Kabayatanna, nupay saan a nakaatendar iti daytoy nga aktibidad ni Bise Gobernador Cecilia Araneta Marcos ket insuno met daytoy ni Dr. Medeldorf Gaoat, Chairman ti Committee on Health ti Sangguniang Panlalawigan.
Kangrunaan a nagbalin a mensahena ti panangipatalgedna ti naan-anay a suportana iti pannakapatibker ti programa kontra iti cervical cancer.
Kagiddan daytoy, sinaludaranna ni Mayor Chrislyn Abadilla ken dagiti ahensia a kabinbinnulig ti gobierno munisipal ti ili a Banna iti pannakaitandudu ti pannakaiyammo a naimbag iti Human Papillomavirus a nakapatpateg iti panangsaluad ti salun-at dagiti kakailian nangnangruna kadagiti babbai.
Innayonna a babaen iti pannakapatibker ti panagbakuna ti Human Papillomavirus ket saanna laeng a lapdan ti pannakaiyakar ti human papillomavirus ngem masaluadan pay ti salun-at ti sumarsaruno a henerasion.
