LAOAG CITY – Maladingitan ti opisina ni Ilocos Norte 1st District Rep. Sandro Marcos seknan kadagiti alegasyon ni Miss Levy Jane Molina kontra iti sumagmamano nga empleado.
Ni Molina ket dati nga empleado iti nasao nga opisina ken nagserbi iti nasurok a maysa a tawen iti umuna a distrito.
Basar iti inparuk-at nga statement ti opisina ti kongresista, naduktalan ti Presidential Security Group nga inusar ni Molina ti nasao nga opisina , karaman dagiti empleado na ken dadduma pay nga indibidual tapno makakalap ti pondo para iti bukod na a pagsayaatan.
Naduktalan daytoy Presidential Security Group kalpasan a nagturong dagiti tattao iti opisina tapno singiren dagiti inkari a bayad ni Molina .
Naamoan a dagiti nabiktima kadagiti saan nga otorisado a transaksyon ket plano da koma ti agpila ti reklamo nga estafa ngem nakisarita ti opisina nga itantan da paylaeng kas paset ti panangawat da iti sitwasyon ni Molina.
Maipanggep met kadagiti rakurak ni Molina seknan ti tulong manipod iti Department of Social Welfare and Development, Department of Health ken Department of Labor and Employment, dagitoy nga ahensya ti mismo nga adda ti bilegna nga agiproseso, mangaprubar ken agibunong kadagiti benepisyaryo.
Naipalaon pay iti statement a makikaysa ti opisina iti sitwasyon ni Molina ken kalikagom ti opisina nga idanun a kas umili iti umuna a distrito, sidadaan da latta a mangawat kenkuana ken mabalin na a gundawayan ti aniaman a tulong nga ipaay ti ahensya.
Basar kadagiti report, ni Molina ket agdama nga agtrabtrabaho iti babaen ti opisina ni Vice Mayor Carlos Fariñas, partikular iti PEPSI COLA warehouse ditoy ciudad ti Laoag.
Immuna iti daytoy, inbutaktak ni Molina dagiti maipagarup nga anomalya iti nasao a pangopisinaan.
Daytoy ket kalpasan nga inakusaranna dagiti sumagmamano nga agpapaay iti nasao nga opisina nga iman-manipularda dagiti tulong a maipaay kuma kadagiti umili.
Segun kenkuana, adda dagiti benepisiaryo nga uray saan met a residente iti ciudad ti Laoag ket mailislista ti nagan da kadagiti nagduduma a tulong nga ipapaay ti nasao a pangopisinaan.
Inbatadna nga adda pay dagiti sumagmamano nga indibidual nga agturturong iti opisina ni Cong. Sandro Marcos nga agpatulong ngem saan a maipapaay ti umno.
Malaksid iti daytoy, kwinesyunaran na pay ti nababa a sweldo na kas consultant iti 1st District Congressional Office gapu ta walo ribu laeng ti maaw-awat na kada bulan.
