LAOAG CITY – Arigna nagbalin nga umok ti war on drugs ken reward system ti Criminal Investigation and Detection Group (CIDG) Region 11 iti ciudad ti Davao nga indauluan ni retired Police Colonel Edilberto Leonardo.
Daytoy ti nagbalin nga statement ti dati a Philippine Charity Sweepstakes Office (PCSO) General Manager ken retirado a Police Colonel Royina Garma a naisubmitir iti House Quad Committee.
Segun kenni Garma, nangbukel ni Leonardo iti grupo dagiti mapagtalkan nga operatiba a mangisayangkat kadagiti operasion mainaig iti gubat ti administrasion ni Duterte kontra iti illegal a droga.
Dinakamat ni Garma a ti nadakamat a grupo ket buklen dagiti polis a da Rommel Bactat, Rodel Cerbo, Michael Palma, ken Lester Berganio no sadinno nga isuda ti nangurnong iti impormasion maipapan kadagiti mapapati a nairaman iti droga.
Isuda pay ti maipagarup nga agar-aramid iti report maipapan iti pannakaarestar ken pannakapapatay dagiti masuspetsa a nairaman iti illegal a droga a maipagarup a naisubmitir ken ni Leonardo, a mangikeddeng iti “level” ti operasion ken mangikeddeng iti gatad ti “gunggona” a maawatda no sadinno a mabalin nga umabot iti 20,000 a pisos agingga iti maysa a milyon a pisos.
Inpalgak pay ni Garma a ni Peter Parungo, a dati a naibalud gapu iti panangrames, ti nangimanehar kadagiti pinansial a transaksion mainaig iti task force.
