LAOAG CITY – Babaen pay laeng iti virtual ti pannakaiyuswat ti regular session iti ili ti Solsona gapu iti panagquarantine dagiti kameng ti sanggunian bayan ken sumagmamano nga empleado.
Kuna ni Solsona Acting Vice Mayor Jonathan de Lara a daytoy ket kalpasan a nadeterminar da kas secondary contact ti nagpositibo iti covid-19 nga asawa ti maysa a kameng ti sanngunian bayan.
Inbatad ni de Lara a nu pay negatibo ti resulta ti antigen test ti konsehal nga asawa ti nagpositibo ket masapol a mauray ti resulta ti swab test daytoy.
Inbunannag na nga apaman a rumuar ti resulta ket dita a maamoan ti sumaruno nga addang mainaig iti panag-quarantine dagitoy.
Immunan nga inpakaammo ti opisyal a namunganay ti panagbalinda a secondary contact kalpasan a nakapulapol da ti konsehal iti kaudian a session a naiyuswat idi martes.
Iti agdama, kuna ti opisyal a dagiti saan a pisikal a simrek iti trabaho idi martes ti mangipaay pay laeng ti serbisyo iti munisipyo iti ili ti Solsona.
