LAOAG CITY – Inbatad ni Police Lt. Col. Michael Agoncillo, ti chief of police iti ciudad ti Batac a kanayun a palagipan da dagiti opisyal ti barangay no siasinno dagiti exempted iti checkpoint.
Reaksyon na daytoy mainaig iti napasamak kadagiti sumagmamano nga staff iti Mariano Marcos Memorial Hospital and Medical Center iti ciudad ti Batac a maipagarop a saanda a napalubusan a simrek iti pagnanaedan da a barangay kalpasan nga adda ti dua a nairekord a kaso ti covid-19 ditoy probinsya.
Inpetteng ni Agoncillo a saan da a nagkurang a mangpalpalagip kadagiti opisyal ti barangay a masapol nga ibilang da a VIP dagiti frontliners kangrunaan na dagiti agpapaay kadagiti ospital.
Innayon ni Agoncillo a no adda dagiti frontliners a saan a mapalabusan a magna kadagiti checkpoints ket mabalin dagiti maseknan ti agpila ti reklamo gapu iti panaglabsing dagiti opisyal ti barangay iti Excutive Order (EO) manipod iti gobierno national.
Nagballaag ti opisyal a ti multa dagiti manglabsing iti EO ket umabot ti 200 ribo a pisos ken mabalin a mabalud iti saan a nababbaba ngem innem a tawen.
