LAOAG CITY – Agtultuloy ti imbestigasyon ti PNP-San Nicolas iti napasamak a pammaltog a nakatamaan ti barukong ken takyag ti maysa a lalaki idiay Barangay 22 iti nasao nga ili.
Binigbig ni Police Inspector Ronald Abian, imbestigador ti PNP-San Nicolas ti biktima a ni Joey Tungpalan, vice president ti farmers association iti nasao a barangay.
Segun kenni Abian, bayat nga insardeng ti biktima ti lugan na agarop pito a metro ti kaadayo na iti balay na ket ditoy a pinaltogan dagiti nakamotorsiklo a suspek.
Inlawlawag na nga idi nakadanon da iti nakapasamakan ti krimen ket adda pay laeng ti puut ti biktima ken makasarita pay laeng ken dagus a naitaray iti ospital.
Kunana a mabalin a saan pay a nakababa iti lugan na ti biktimagapo ta adda ti nakita a dara iti uneg ti behikulo na.
Naamoan a kalpasan ti pammaltog ket dagus a naglibas a nagturong iti daya a direksyon.
Narekobre dagiti otoridad ti tallo a kapsula iti saan pay a naestablisar no anya a kalibre a paltog.
Kabayatanna, Kinumpirmaran ti saanen a nainagan nga anak ni Jpey Tungpalan nga adda ti naibaga ti ama na a nagan a nangpaltog kenkuna sakbay a naitaray iti ospital.
Binigbig na dagiti itudtudo na a suspek a da Antonio Major, a taga Barangay 8 ken George Passion ken Barangay 13 iti nasao nga ili.
Naamoan a ni Major ti prsidente ken ni met Passion ti treasurer ti asosayon a pagopisyalan met laeng ti ama na.
Inbatad na nga idi adda ti nangngeg na a putok ti paltog ket dagus a rimuar ken ditoy a nakita na ti ama na a nakadasay ken agdadara ti ima na.
Inlawlawag na a ti posible a rason ti krimen ket pakaseknan iti panagpadanom ti irigasyon no sadinno nga adda ti agbaybayad ken saan nga agbaybayad ngem agap-apit latta a mannalon.
Kabayatanna, dagus a nagturong iti PNP-San Nicolas dagiti dua a nadakamat a suspek kalpasan a nangegan da iti Bombo Radyo ti nagan da a maitudtudo nga akin-aramid ti krimen.
Iti agdama ket stable ti kasasaad ti nasao a biktima ti pammaltog.
