LAOAG CITY – Kinumpirmaran ni Agent Gerald Butale iti National Bureau of Investigation (NBI) ditoy ciudad ti Laoag ti pannakaluko dagiti sumagmamano nga indibidwal babaen ti SPVTOP International Inc.
Ti nasao a kompanya ket nakabase idiay Unit 205 National Life Building, Upper Session Rd. Baguio City ken agpapa-invest ti kwarta ken nagkari a makaawat dagiti miembro ti binulan wenno 10 a porsyento manipud iti kwarta da.
Segun kenni Butale, idi un-una ket makaaw-awat pay laeng dagiti miembro ti kwarta iti binulan ngem iti bulan ti Setyembre wenno Oktubre ket timmalbog ti tseke da.
Inlawlawag na a kinumpirmaran met ti Security and Exchange Commission a saan nga otorisado ti nasao a kompanya nga agpa-invest gapo ta awan ti umiso a papeles na.
Gapo iti daytoy, tinawagan dagiti biktima ti recruiter da ngem saan dan a ma-contact rason a nagipila da ti kaso.
Karaman kadagiti nabiktima iti daytoy ket ni Police Executive Master Sergeant Diomedes Ancheta, taga Claveria, Cagayan ken nakabase iti Bangui-PNP ditoy probinsya.
Basar ti report, nakapag-invest ni Ancheta ti nasurok maysa a milyon a pisos ken dagiti dadduma pay a biktima ket mangisursuro, doktor, negosyante ken dadduma pay.
Manamnama a sumango dagiti opisyal ti nasao a kompanya ti syndicated estafa, panaglabsing iti Presidential Decree 1689 ken Republic Act 8799 ken Bouncing Check Law.
