LAOAG CITY – Inbatad ni Mayor Remigio Medrano iti ili ti Sarrat a saanna a mababalaw dagiti tattao a mang-discriminate kadagiti taga Sarrat gapu ta mismo pay a dagiti opisyal ti Barangay 9 iti nasao nga ili ti mangdis-discriminate kadagiti nagpositibo ti covid-19 iti barangay da.
Inistorya ti mayor nga adda ti maysa nga agtawen ti 3 nga ubing a paaywanan da koma kadagiti opisyal ti barangay ken pagyanen da iti barangay hall gapu ta ti ama na ket nagpositibo ti virus idinto a ti ina na ket nakitaan ti sintomas ti nasao a sakit.
Nupay kasta, inbaga dagiti opisyal ti barangay iti panangidaulo ni Barangay Chairman Wenceslao Valdez iti Barangay 9 iti ili ti Sarrat a pagturugan da ti barangay hall para iti panagmonitor da iti lockdown ti barangay da.
Inbaga ti mayor a dagiti koma opisyal ti barangay iti umuna a mangipakita ti usto a pannakaawat kadagiti kabarangayan da a nagpositibo ti virus ngem isuda met ti umuna a mangipakita a kaaryek da dagiti covid-19 patients.
Inpakaammo ni Mayor Medrano a gapu ta maibayag unayen ti pannakaikabil ti ina ti ubing iti ospital ket kapilitan nga intugot da daytoy iti Governor Roque Ablan Senior Memorial Hospital (GRASMH) ditoy ciudad ken nakisarita da a no mabalin ket agyan pay laeng ti ubing iti ospital.
Nupay kasta, saan nga inawat ti ospital ti ubing gapu ta ma-compromise ti salun-at na isut gapuna nga awan ti sabali a pangipanan da ti ubing no saan nga iti ama na a ni IN-C45 kalpasan a na-expose metten ti ubing kenkuana ken ti pasyente ket asymtomatic.
Inpetteng ni Mayor Medrano a dagiti opisyal ti barangay 9 kangrunaan na ti kapitan ket saanda a rumbeng nga agbayag iti pwesto gapu ta saan da pulos a maisakit ken mabantayan dagiti kabarangayan da.
Inpasingked na a naiget ti panangmonmonitor da iti kasasaad ti ubing pakairamanan ti ama na a ni IN-C45.
