LAOAG CITY – Naliday ni Barangay Kagawad Eusebio Raranggol iti Barangay 9, San Lorenzo iti ili ti Sarrat gapo iti baro manen a kaso ti covid-19 iti barangay da.
Segun kenni Raranggol, arig na saan da a makasarita gapo iti mapaspasaran dagiti kabarangayan da.
Ummuna iti daytoy, kinumpirmaran ti gobierno probinsyal nga innem ti baro a kaso ti covid-19 ditoy probinsya no sadinno ket lima kadagitoy ti residente iti Barangay 9.
Ni IN-C44 ket maysa a babai nga agtawen ti 60; IN-C45, lalaki nga agtawen ti 39; IN-C46 ket maysa nga ubing a babai nga agtawen ti 10; IN-C47 ket agtawen ti 34 a babai; IN-C48 nga agtawen ti 42 ken ti IN-C49 ket lalaki nga agtawen ti 63.
Inbatad ni Raranggol a kadagiti baro a nagpositibo ket tallo kadagitoy ti agkakabbalay nga isuda IN-C44, IN-C46 ken IN-C47.
Inlawlawag na pay a napan da binalakadan dagiti indibidwal a nagatendar iti maysa a pasken iti nagpositibo a saan da pay laeng nga agruruwar.
Inpasigurado met ni Raranggol a bantayan da a nalaing dagiti kabarangayan da ken katulungan da dagiti kameng ti PNP ken dadduma pay.
Kunana pay nga uray ti curfew hours ket alas-nuebe ti rabii agingga iti alas-kwatro ti parbangon, inpatungpal ti lokal a gobierno ken sinurot da ti alas-otso ti rabii agingga iti alas-singko ti bigat uray pay idi awan ti nagpositibo iti barangay da.
Kabayatanna, immapela met ni Raranggol kadagiti kabarangayan da a sumurot latta kadagiti health protocols kangrunaan na ti panagtalinaed iti uneg ti pagtaengan.
