LAOAG CITY – Inpakaammo ni PMaj. Joseph Tayaban, ti hepe iti PNP-San Nicolas a balligi ti naiyuswat nga Oplan Baklas iti nasao nga ili.
Kuna na a daytoy ket babaen iti panagtitinnulong ti BFP, PNP ken iti panangidaulo ni provincial comelec officer Mrs. Josephine Balbas.
Inbatad na a kangrunaan a nabaklas ket dagiti campaign posters nga adda iti igid ti kalsada wenno iti puon ti kayo.
Karaman ditoy dagiti dadakkel a campaign posters a naikabit kadagiti alad ken waiting shed ken umabot iti 39 ti kabuklan dagiti nabaklas.
Maipalagip a naiget ti panangipawil ti Commission on Elections ti panagikabit kadagiti election campaign wenno propaganda material iti saan nga otorisado a poster areas, pampubliko a lugar wenno private properties nga awan ti pammalubos ti agtagikua.
Dagiti nadakamat a public places ket ti publicly owned electronic announcement boards, motor vehicles, mass public transport a kukua ti gobierno, waiting sheds, sidewalks, pagadalan pakairamanan ti public transport terminals.
