LAOAG CITY – Nangiwayat ti tignay protesta iti uneg ti parliamento ti Serbia dagiti opposition lawmakers kalpasan a nangipurwak dagitoy ti smoke grenade ken nagusarda pay ti pepper spray tapno lappedan ti gobierno kadagiti korapsion ken suportaran ti demonstrating students.
Namunganay daytoy kalpasan nga inpasa ti Serbian Progressive Party ti agenda a naiget a saan a kanunungan dagiti dadduma nga agpanpanday linteg no sadinno a napanda dinarup ti parliamentary speaker ken nangriribok kadagiti guardia.
Ti riribok iti uneg ti parliamento ket nangitunda ti pannaka-stroke ti maysa nga opisial ken nakasugatan ti tallo a dadduma pay.
Nangrugi dagiti tignay protesta, addan ti uppat a bulanen ti napalabas mainaig iti pannakatay ti 15 nga indibidual kalpasan a narpuog iti sibubukel nga istasion ti tren iti Novi Sad.
Gapu iti daytoy, limmawa dagiti demonstrasion a nangrugi kadagiti agad-adal a supsuportaran met dagiti mangisursuro, mannalon ken dadduma pay a sektor iti Serbia.
Iti ruar ti parliamento, ginas-gasot ti napan nagprotesta a naulimek kas panangipakita ti respeto kadagiti natay.
Naammoan a mangiwayat dagitoy ti dakkel a tignay protesta iti Belgrade inton Marso 15.
Kabayatanna, kinondenar met ni Serbian President Aleksandar Vucic dagiti tignay ti oposision ken inawaganna a ”hooliganism,” ken mapagsungbat dagiti adda iti likudan ti riribok.
Iti baet nga adda ti parliamentary immunity dagiti agpanpanday linteg idiay Serbia, mabalinda nga ibasura daytoy no mapaneknekan a karamanda iti riribok.
