LAOAG CITY – Kalikagum ni Laoag City Vice Mayor Carlos Fariñas a mapabaro ti ordinansa seknan iti iodized salt.
Segun kenkuana, makaalarma gapu ta saaanen a masursurot ti nasao a linteg nangruna ket ti iodized salt ket makatulong iti panangpadakkel kadagiti ubbing.
Inbatadna a naduktalanna babaen ken ni Ms. Marlene Gayoc, ti Nutrition Action Officer ditoy siudad ti Laoag nga adda ti nababa a puesto ti probinsia maipanggep iti nasao a banag.
Kunana a ti kinaepektibo ti salt iodization program ket adda ti iodine mixed iti asin nga inaldaw nga us-usaren dagiti tattao.
Innayonna a naputar pay laeng idi tawen 2002 ti nadakamat nga ordinansa isu a gagemna a mabalbaliwan dagiti sumagmamano a nailanad iti daytoy.
Mainaig iti daytoy, naipaima iti Chairman ti Committee on Health ti Sangguniang Panlungsod ditoy siudad ti Laoag tapno maamendaran ti nasao nga ordinansa.
Kabayatanna, manamnama a maadal ken matingiting a naimbag ti nasao nga ordinansa iti sumaruno a regular session ti konseho.
